نقطة ومن أول السطر .. الحلقة الرابعة .. اللعب على المكشوف

الحمد لله حمد كثيرا طيبا مباركا فيه .. لا يرضى لعباده الكفر ويعاقب من يرتضيه .. وأرسل الرسل وأوحى إليهم من أنباء الغيب ما يوحيه ..وذلك فضل الله لمن يشاء يؤتيه .. فألزمهم كلمة التوحيد فابتعدوا عن نواهيه .. فوصى بها إبراهيم بنيه..فمن استمسك بها كانت من النار تنجيه .. ومن صد عنها فالنار يصليه

أيا من ليس لي منه مجير .. بعفوك من عذابك أستجير
أنا العبد المقر بكل ذنب ... وأنت السيد المولى القدير
فإن عذبتني فبسوء فعلي ..... وإن تغفر فأنت به جدير
عصيت وتبت من ذنبي وإني .. إلى الغفران محتاج فقير
أفر إليك منك وأين إلا ..... إليك يفر منك المستجير

أبيات جميلة رائعة
أبيات لواحد مسلم .. وقف مرة في حياته وقال .. لا كفاية .. نقطة ومن أول السطر
شخص أشتهر بإنه كان أفسق الناس وأفجرهم .. أشعاره ممتلئة بالكلام عن الخمر والزنا واللواط والتعدي على جلال الله والاستهزاء بالتوحيد والكثير والكثير من ذلك
وفجأة .. قال كفاية .. نقطة ومن أول السطر
في آخر حياته وبعد ما طال العمر بيه في المعاصي وقضى حياته بين الجواري والغلمان والخمر والفجور وكل أنواع المعاصي
تخيل لو قلتلك إنه يحكي إنه كان بيقول الأبيات الي فوق دي وهو ساجد كما تقول إحدى الروايات
عارفين مين دا .. الشاعر العربي المسلم .. أبو نواس
قيل في كيفية وفاته

أنه وبسبب فسقه ومجونه ندم ندماً شديداً في أواخر حياته وأراد أن يكفَّر عن ما فعله من فسق ومجون فانعزلَ للتعبد والذكر ويقول ابن هفان وهو من أشهر رواة شعر أبو نواس ومن المقربين منه :-أن أبو نواس حين اشتد به المرض وازداد وجعه وتمعطت لحيته وتغيرت حالته دخل عليه صديق له وهو يحتضر وسأله :- يا أبا نواس كيف تجدك ؟قال : أجدني على الحق وإنا لله وإنا إليه راجعون على ما قدمت ويا حسرتي على ما فرطت في حق الله سبحانه ثم أنشد :

دبَّ فيَّ البلاءُ سُفْلاً وعُلْموا .. وأراني أموت عضواً فعضوا

قد أسأنا كلَّ الإساءة فا للهم .. صفحاً عنَّا وغفراًناً وعفوا

ويقال أنه مات من ساعة انتهائه من أنشاد هذه الأبيات

خلونا نسأل نفسنا سؤال .. ايه الي خلى أبو نواس يتغير التغير الكبير دا ؟؟؟
بعد كل الحياة الطويلة من المعاصي .. ايه الي غيره ؟؟
الي غيره إنه كان صادق مع نفسه
كان عايز يتوب .. إنتا عايز تتوب فعلا ؟؟
إنتا فعلا عايز تحط نقطة وتبدأ من أول السطر ؟؟؟
خلينا ما نكدبش على بعض ونتكلم بصراحة ومانلفش وندور على بعض

أنا وإنتا عايزين فعلا نتوب ؟؟؟

هتقولي: آه طبعا .. دا أنا نفسي أتــــــــ
ماتكملش بالله عليك .. فتش جوا قلبك .. إنتا بجد عايز تتوب؟؟ .. أصل لو إنتا عايز بجد تتوب كان ربنا تاب عليك وخلصت المشكلة .. لكن كونك لسه في المعاصي وبتقول عايز أتوب أكيد في حاجة غلط
عارف المشكلة فين .. في العبارة الخطيرة دي لابن الجوزي كان بيقول : إنما يتعثر من لم يخلص
عرفت إيه الي بيوقعك
إن قلبك لسه محتار
عايز تتوب .. وعايز ذنوب .. طيب تيجي إزاي دي ؟؟؟
عايز دنيا وعايز آخرة
خلينا صراحة نتكلم على المكشوف بعيد عن بعض كلام الناس المضللين والدعاة الي على أبواب جهنم الي بيقلولك ممكن تتنعم دنيا وآخرة .. وتعيش الحياة وردي والآخرة وردي أقولك على حاجة .. صلى على رسول الله .. صلى الله عليه وسلم
إنتا بتصدق ربنا ؟؟
طبعا أكيد بتصدقه ومن أصدق من الله قيلا ؟؟؟
طيب شوف ربنا بيقول ايه في القرآن

{أَمْ حَسِبْتُمْ أَن تَدْخُلُواْ الْجَنَّةَ وَلَمَّا يَأْتِكُم مَّثَلُ الَّذِينَ خَلَوْاْ مِن قَبْلِكُم مَّسَّتْهُمُ الْبَأْسَاء وَالضَّرَّاء وَزُلْزِلُواْ حَتَّى يَقُولَ الرَّسُولُ وَالَّذِينَ آمَنُواْ مَعَهُ مَتَى نَصْرُ اللّهِ أَلا إِنَّ نَصْرَ اللّهِ قَرِيبٌ }البقرة214

عايز تتدخل الجنة من غير ما تتزلزل ؟؟؟
من غير ما تشوف بأساء وضراء
طيب إزاي إذا كان الي هيدخلهالك بيقولك مش هتدخل غير لما يحصلك كده
عايز تتوب يبقى لازم هتضحي بحاجات .. وصدقني حاجات ما تستاهلش
لكن لو فاكر إنك هتعيشها كده .. لو هتخادع ربنا تبقى غلطان
لو فاكر إنك تقدر تدخل تصلي في المسجد وفي جيبك الموبايل الي كله نمر بنات وتخرج تكمل كلامك بعد الصلاى وهتعدي .. ودا يشيل دا
لو فاكرة إنك هتصلي وتقيمي الليل وتحفظي قرآن وفي الآخر خارجة بحجاب .. الحجاب منه براء ودا يشيل دا
اقول لكل واحد بيفكر بالشكل دا .. غلطان .. مش هتمشي على الحبلين .. يا كلها دنيا فمالكش غير الدنيا .. يا كلها آخرة .. فربنا يديك من الدنيا الي يرضيك ويصونك وليك الآخرة
شوف ربنا عز وجل في الحديث القدسي بيقول ايه

قال الله عز وجل ، و عزتي لا أجمع لعبدي أمنين و لا خوفين ، إن هو أمنني في الدنيا أخفته يوم أجمع فيه عبادي ، و إن هو خافني في الدنيا أمنته يوم أجمع فيه عبادي
الراوي: شداد بن أوس - خلاصة الدرجة: صحيح - المحدث: الألباني - المصدر: السلسلة الصحيحة - الصفحة أو الرقم: 742
أقول لنفسي قبل ما أقول لكل واحد فيكم

ما تخادعش ربنا علشان هيخادعك .. {إِنَّ الْمُنَافِقِينَ يُخَادِعُونَ اللّهَ وَهُوَ خَادِعُهُمْ وَإِذَا قَامُواْ إِلَى الصَّلاَةِ قَامُواْ كُسَالَى يُرَآؤُونَ النَّاسَ وَلاَ يَذْكُرُونَ اللّهَ إِلاَّ قَلِيلاً }النساء142
يطلع واحد يقول : لا انتا مزودها قوي .. نفاق ايه دا بس النفس ضعيفة دا

يا أخي النهاردة اللعب على المكشوف زي ما بيقولوا
خلي عينك في عيني كده وبص جوايا وهبص جواك .. شايف النفاق الي في قلوبنا .. كام مرة نواعد ربنا ونخلف .. كام مرة نقول هنعمل ومن جوانا مش عايزين نعمل .. كام مرة نقول هنتوب وإحنا مش عايزين نتوب
يرد يقول : بس .. أصل .. يعني مش نفاق قوي يعني
أقوله وأقول لنفسي .. طيب بالله عليك إنتا عارف نفسك أكتر مني بصراحة .. في نفاق ولا لا
يرد يقول .. يعني بس .... هو ................ بصراحة أيوة
الحمد لله
دا الي عايز أوصله النهاردة في الحلقة .. يا جماعة وباختصار .. إحنا مش صادقين مع ربنا وأنا أولكم
خلونا النهاردة نقف وقفة صدق
قول .. أنا كداب .. توب من الكدب الأول وخلونا بعد ما كشفنا ورقنا كلنا نحط نقطة من أول وجديد بالمعطيات الجديدة
بعد ما اكتشفنا كدبنا .. بعد ما فهمنا إن ماينفعش نلعب على كل الحبال .. يا دنيا يا آخرة
اسمعوا الآيتين دول من سورة محمد .. آيتين بجد بيوصفوا حالنا

وَيَقُولُ الَّذِينَ آمَنُوا لَوْلَا نُزِّلَتْ سُورَةٌ فَإِذَا أُنزِلَتْ سُورَةٌ مُّحْكَمَةٌ وَذُكِرَ فِيهَا الْقِتَالُ رَأَيْتَ الَّذِينَ فِي قُلُوبِهِم مَّرَضٌ يَنظُرُونَ إِلَيْكَ نَظَرَ الْمَغْشِيِّ عَلَيْهِ مِنَ الْمَوْتِ فَأَوْلَى لَهُمْ

طَاعَةٌ وَقَوْلٌ مَّعْرُوفٌ فَإِذَا عَزَمَ الْأَمْرُ فَلَوْ صَدَقُوا اللَّهَ لَكَانَ خَيْراً لَّهُمْ

(20-21) سورة محمد

كله يقولك .. إحنا عايزين نتوب .. عايزين نعمل .. دا بس لو يسيبوني على اليهود دا أنا أفرمهم ..وتلاقيه مش قادر يصحى لصلاة الفجر .. ولو قلتله ممكن تجاهد في والديك تلاقيه يبلع الكلام بامتعاض ويقولك طبعا طبعا أقوله فَإِذَا عَزَمَ الْأَمْرُ فَلَوْ صَدَقُوا اللَّهَ لَكَانَ خَيْراً لَّهُمْ

الأخت من دول تقولك .. الإسلام .. الدعوة .. الأمة الإسلامية .. عايزين نخرج جيل .. عايزين نغير الدنيا ... وهيا ما زالت مش قادرة تقاوم نفسها وتلبس حجاب شرعي يرضى ربنا .. أقولها فَإِذَا عَزَمَ الْأَمْرُ فَلَوْ صَدَقُوا اللَّهَ لَكَانَ خَيْراً لَّهُمْ

الأخ من دول يقولك أنا عايز أرفع الأمة لفوق .. عايز أجدد الدين .. أغير وجه الدعوة .. وبعدين تلاقيه فاشل في حياته وحجة على الدين والملتزمين وكسول وأينما توجهه لا يأتي بخير.. أقوله فَإِذَا عَزَمَ الْأَمْرُ فَلَوْ صَدَقُوا اللَّهَ لَكَانَ خَيْراً لَّهُمْ

وأخت تانية .. تقولك لازم يكون ليا دور في الصحوة .. لازم نشارك زي الصحابيات .. لازم يكون لينا قدوة زي السيدة خديجة .. وبعدين تلاقيها من هنا لهنا ومن هنا لهنا في خروج دائم باسم العمل الجماعي والعمل الدعوي وترجع في بالليل لوحدها البيت .. بالرغم من إن السيدة خديجة نصرت الإسلام من غير ما تخرج من بيتها وكل الصحابيات نصروا الإسلام وهما ملتزمين بمبدأ وقرن في بيوتكن .. أقولها فَإِذَا عَزَمَ الْأَمْرُ فَلَوْ صَدَقُوا اللَّهَ لَكَانَ خَيْراً لَّهُمْ
أخوتي

الصادق حبيب الرحمن

خلوا دي النصيحة لينا لحد اللقاء الجاي والي إن شاء الله مش هيكون بعيد .. خليها ترن في دماغك على طول .. كل وقت .. علقها فوق جهاز الكمبيوتر بتاعك .. فوق سريرك .. على الباب .. تذكر دايما .. فَإِذَا عَزَمَ الْأَمْرُ فَلَوْ صَدَقُوا اللَّهَ لَكَانَ خَيْراً لَّهُمْ

**********************

أترككم مع المقطع الرائع دا للعلماء عن الصدق

**********************

هذا وستذكرون ما أقول لكم وأفوض أمري إلى الله

استراحة

السلام عليكم ورحمة الله بركاته
الحمد لله رب العالمين، والصلاة والسلام علي أشرف الأنبياء والمرسلين، وبعد...

مستقبلك بين ايديك

كل واحد فينا دلوقتي واقف في مفترق طرق، واقف علي عتبة حياة جديدة، في مراحل خلاص انتهت من حياته ولكن المراحل الأهم بدأت تدق علي الأبواب، شوية ورايح علي الجيش يقضي فيه سنة او اكتر او اقل، معندوش جيش لكنه بيفكر يكمل دراسات عليا، كده أو كده عايز يشتغل في شركة محترمة براتب محترم، عايز يجوز، عايز يتفرغ لحياته هو بس، عايز يبقي الاستاذ فلان أو الدكتور فلان، عايز يشتري العربية اللي هتريحه من المواصلات، عايز الشغل القريب من البيت، عايز البيت الكبير والاولاد الكتير، عايز يبقي....... عايز يبقي حر، وعايز وعايز وعايز
لكن في الأهم من ده كله...
وهو في اهم من كده...
الحاجات دي مهمة ومهمة جدا لكن في الأهم منها وهو...
ازاي يوصل للحاجات دي كلها في اقل وقت وباقل مجهود ...
لا في الاهم من كده كمان...
وايه بقي؟؟
ان الحاجات دي كلها توصله الجنة
يا أخي وقعت قلبي...
معلش لازم قلبك يوقع ولازم تفكر ألف مرة في حياتك هتكمل ازاي، لازم تعرف ان الحاجات دي كلها عبارة عن وسائل نوصل بيها مش غايات نسعي لها
قصدك ايه...
قصدي ان البيت الكبير والاولاد الكتير والمال الوفير مش هي دي هدفنا وغايتنا
ياسلام!! طيب هدفنا ايه بقي ؟!!
هدفنا هو دخول الجنة واي حاجة تانية تكون وسيلة، البيت الكبير لازم يكون وسيلة لدخول الجنة ونفتكر قارون ربنا خسف ببيته الأرض (وخسفنا به وبداره الأرض)، الزوج أو الزوجة والأولاد لازم يكونوا وسيلة لدخول الجنة ونفتكر انهم هيتعلقوا في رقبتنا يوم القيامة لاننا مسؤلين عنهم، المال لازم يكون وسيلة لدخول الجنة ونفتكر كلام الرسول صلي الله عليه وسلم (فتنة امتي المال)، عارف النبي صلي الله عليه وسلم بيقول ايه تاني عن المال (تعس عبد الدينار وعبد الدرهم وعبد الخميصة إن أعطي رضي وإن لم يعط سخط تعس وانتكس وإذا شيك فلا انتقش)، الحديث ده صعب جدا ممكن تكون شايفه عادي زي ما انا كنت شايفه ولكن لما تعرف الشرح تعرف ازاي هو صعب لما تعرف ان الواحد ممكن يبقي مشرك بالله لانه بيقدم الشغل علي صلاته، لانه بيتهم بوقت الحضور والانصراف في الشغل اكتر من اهتمامه بوقت الاذان والاقامة، لانه بيفكر ويتعب ويشقي عشان يجيب الفلوس ويبقي مضايق انه هيدفع الزكاة، لما يجمع في الفلوس ويستخسر يروح يحج عشان يعمل المشروع الفلاني، لما وقته كله يبقي عشان يجيب فلوس للزوجة والاولاد والنادي والعربية والشركة ويغرق في الدوامة دي كلها وتلاقيها راجع بيته هلكان وتعبه رايح لغيره وهو في الاخر ممكن يكون اشرك بالله وهو مش عارف هتقولي انت مكبر الموضوع هقولك بص في الحديث كويس الرسول صلي الله عليه وسلم وصف المهتم بالمال اكتر من اللازم بانه عبد للدينار وللدرهم والخميصة (نوع فخم جدا من القماش) كلمة عبد اللي عارفين كلنا انها متكونش لغير لله، ياريت علي كده وبس الرسول صلي الله عليه وسلم بيدعي عليه كمان بانه يبقي تعيس في الدنيا ودعوة النبي مستجابة بلا شك يبقي تعيس في كل حاجة طول النهار تعبان وقرفان في الشغل ويروح يلاقي قايمة الطلبات حتي النوم مش عارف يتهنا عليه قايم من بدري جري عشان يجيب فلوس ده يبقي تعيس ولا سعيد وفرحان وياريت دعوة النبي صلي الله عليه وسلم عليه بالتعاسة بس، لا كمان الانتكاس وهو البعد عن الحق والصواب والطريق المستقيم وكمان (اذا شيك فلا انتقش) اذا دخلت في رجله شوكة ميلاقيش اللي يخرجه منه. بجد كلام صعب جدا يخلي كل واحد يفكر اكتر من مرة فيه.
الموضوع صعب بقي...
الموضوع صعب فعلاً عشان كده لازم نحدد من دلوقتي بكل وضوح ان هدفنا هو دخول الجنة واي حاجة تانية مش اكتر من وسيلة لدخول الجنة ونفتكر كلمة بتقول (كل نعيم دون الجنة حقير وكل عذاب دون النار عافية)، لازم احدد حياتي هتمشي ازاي هشتغل ايه وهشتغل كم ساعة في اليوم وهشتغلي في اي مجال وهاجوز امتي وهاجوز مين وهل اللي هاجوزها او هاجوزه هيساعد علي طاعة الله ويساعدني اكمل حياتي صح ولا لا، لازم افكر هاحفظ قران امتي هاعرف اقرا القران صح امتي هاقدر اعلم اولادي دينهم ولا انا عايز اتعلم ديني صح الاول لازم اعرف الحاجات دي كلها لازم اعرف ازاي حياتي الجاية اللي انا مسئول عنها كلها هتكون ازاي لله مش ربنا بيقول (قل إن صلاتي ونسكي ومحيايي ومماتي لله رب العالمين لا شريك له وبذلك امرت وانا اول المسلمين) وشوف ترتيب الكلام الصلاة تكون لله وكمان الاعم منها المناسك كلها تكون لله والاعم منها ان حياتك كلها تكون لله وفي ده كله لا تشرك بالله احد في ذلك، بجد الموضوع صعب ومهم ولازم نفكر فيه كويس اوي اوي اوي

بس معلش نسيت اقولك التفكير ده مش معناه انك بعد ما قريت الكلام تفرد ضهرك وتغمض عينك وتفكر حوالي دقيقتين خمس دقايق بالكتير ويبقي اسمك فكرت لا، مش مشكلة لو الموضوع خد معك شهر او اكتر دي حياتك ولازم تخطط لها بالورقة والقلم وتسال فلان ايه الاحسن وتستشير فلان اعمل ايه ومش تكتب شوية كلام في ورقة وخلاص لا برضه، فكر في حياتك الجاية انها مشروع زي مشروع التخرج كده بس طبعا اهم مليون مرة واعمل analysis كويس وادرس وحلل كل حاجة وشوف هاتسستم الدنيا ازاي بس خلي بالك لازم ال output يدخلك الجنة ومينفعش حاجة غير كده وممكن كمان تستعين بالناس اللي بيعملوا دراسات الجدوي بيعملوها ازاي وابدا وربنا يكون في عونك وعوني ومتستصعبش الموضوع هاضرب لك مثل بأحد الشباب يحفظ كتاب الله كاملا وكان من اوائل كليته وحصل علي الدكتوراه من انكلترا وهو الان استاذ مساعد بكلية طب الاسكندرية ويدرس العلوم الشريعة بجانب عمله في مجال الطب الذي يتميز فيه ومع كل هذا لم يلبغ سن الاربعين بعد، مش هاطول في الكلام شوف اللقاء اللي تم بينه وبين الشيخ محمد حسين يعقوب وشوف انا ولا انت بنعمل ايه

تحميل

بعد ما شفت اللقاء اسمع الدرس الجميل ده للشيخ محمود المصري بعنوان احلم معايا

سمعت الدرس طيب اسمع التلاوة دي لسورة الفاتحة بصوت الشيخ سعود الشريم وشوف انت بتقراها ازاي

اسمع بقي النشيد الجميل جدا ده للشيخ مشاري راشد بعنوان (يوم الحساب)

سمعت انت كتير اقرا بقي الموقف المؤثر ده مع الشيخ ابن عثيمين

كان خارج من البيت رحمه الله وبيده المبخره متوجه للمسجد واذا بأحد الشباب يقترب من الشيخ ويقول له :يا شيخ ممكن اولع السيجارة؟
فقال له الشيخ : تفضل يا ولدي !!!!!
فاستحى الشاب ثم اصبح بعد هذا الموقف واحد من طلبة الشيخ والملازمين له.

======

من فضائل القرآن وسوره وآياته - الحلقة الرابعة

السلام عليكم ورحمة الله وبركاته

الحمد للهِ الكريم المنان ذيِ الطول، والفضل، والإحسان، الذي هدانا للإيمان، وفضل ديننا على سائر الأديان، ومنَّ عَلينا بإرسالهِ إلينا خيرَ خَلقهِ، مُحمَّد صلى الله عليه وسلم، فمحا به عبادة الأوثان، وأكرمه صلى الله عليه وسلم، وأبانَ بالقُرآنِ المُعجِزة المُستَمرة عَلى تَعاقبُ الأَزمَان التي يتحد بها الجنُّ، والإنسُ، بأَجمَعهم، وأقْحَمَ بِها جميعَ أهلِ الزيغ والطُغيان، وَجَعلهُ رَبيعاً لِقُلوبِ أهلِ البصائر والعِرفان، ولا يخلق عن كَثْرةَ الردِّ، وتغَاير الأَحيان، وَيسَرهُ حتى استظهره صَغائرُ الولدان، وضعَّف الأجرَ في تلاوتهِ، وأعظمَ بهِ في الامتنان.
أَحمدهُ أَبْلغَ الحمد على ذلك، وغيره من نِعمهِ التي أَسْبَغَها علينا في كُل حينٍ وأوان، وأسألهُ المِنَّة عليَّ، وَعلى جَميع أحبَّائي بالرّضوان.
وأَشهد أنْ لا إله إلاَّ الله، شَهادة مُحصّلة للغُفْران، مُنقِذة صاحبها مِنَ النِّيران، مُوصلةً لَه إلى سُكنى الجِنان. وأشهد أن محمد عبده ورسوله صاحب البيان، خير الناس علي كل زمان، صلي الله عليه وسلم في كل حين وأوان.
أمَّا بعد..

فلقد مر بنا الكلام في ذكر بعض فضائل كتاب الله العزيز، وكان ذلك واضحا جلياً فيما ذكرنا من أحاديث صح إسنادها عن النبي صلي الله عليه وسلم، وكان المنتظر أن نبدأ في ذكر ما جاء من فضائل في سور بعينها، ولكن ائذنوا لي أن نرجي ذلك للحلقة القادمة، لنقف وقفة مع الحلقات السابقة وما جاء فيها من أحاديث.

قرأتَ ما قرأتَ في فضائل القرآن فكم قرأتَ من كتاب الله في يومنا هذا؟ وما مجموع ما قرأت خلال هذا الأسبوع؟ بل قل لي ما مجموع ما قرأت من كتاب الله من بعد رمضان الماضي؟

علمتَ أن خير الناس من تعلم القرآن وعلّمه، فأذكر كم آية تعلمتَ تفسيرها وتدبرتَ وتفكرتَ معانيها؟ وكم أمر في كتاب الله نفذتَه؟ وكم نهي اجتنبتَه؟

وبالله عليك هل تأثرت أخلاقك ومعاملاتك وأحوالك بالقرآن الذي تقرأ أم إنها مجرد قراءة وذكر ويتنهي الأمر علي ذلك.

وإذا تحدثنا عن الحفظ فكم تحفظ من كتاب الله؟

لابد من وقفة نعرف فيها أين نحن من كتاب الله والعمل به، وراجع أحاديث الحلقة الأولي، والثانية، والثالثة، وكل حديث صحيح في فضل القرأن، بل وكل حديث يمر عليك ثم أنظر كم نفذت من هذا الحديث؟ كله، نصفه، ربعه، عشره، أي شيء منه. وابدأ العمل خذ أي شيء من الحديث ولو يسير وطبقه ثم زد هذا الجزء اليسير شيء فشيئ حتي تصل إلي العمل بكامل الحديث وإلا فلما تعدد حجج الله عليك بقراءتك وعدم تطبيقك؟

جزاكم الله خيراً.

والسلام عليكم ورحمة الله وبركاته.

بدأ المسير

السلام عليكم ورحمة الله وبركاته

الحمد لله رب العالمين، والصلاة والسلام علي أشرف الأنبياء والمرسلين، وبعد ...

بحمد الله بدأت فعاليات الدورة الشعبانية لرفع اللياقة الايمانية استعدادا لشهر رمضان

إِنِّي ذَاهِبٌ إِلَى رَبِّي سَيَهْدِينِ

وعلي جميع الأعضاء مراجعة جدول مهام الأسبوع الأول
باب الاشتراك لايزال مفتوح

إِنِّي ذَاهِبٌ إِلَى رَبِّي سَيَهْدِينِ

السلام عليكم ورحمة الله وبركاته

الحمد لله رب العالمين، والصلاة والسلام علي أشرف الأنبياء والمرسلين، وبعد ...

• كيف أحوالك في شهر رجب؟
o هو احنا في شهر رجب
• ده فات اكتر من نصفه
o خير الحمد لله
• طيب جاهز ولا لا؟
o جاهز لايه؟
• شهر رمضان
o لسه بدري
• ازاي ومش فاضل غير شهر شعبان
o يعني هاعمل ايه ربنا ييسر الحال
• في ايديك تعمل كتير
o زي ايه
• بايديك تصلي الصلوات الخمسة في جماعة وتدرك تكبيرة الإحرام، وتقرأ كل يوم خمس أجزاء من القرأن، وتصلي 11 ركعة قيام ليل، وتتصدق بصدقات كل يوم، وتذكر ربنا، وتتدبر في آيات الله الكونية، وغيرها وغيره، في ايديك حاجات كتير
o يا عم دا انا حاسس بخمول فظيع ومش قادر اعمل اي حاجة خاصة ان احنا في وقت اجازة ونوم
• طيب ايه رايك انك ممكن تعمل الحاجات دي كلها واكتر
o ازاي
• بالتدريب
o صعب اوي
• لا مش صعب، ايه رايك انا وأنت نشجع بعض وكل يوم نعمل حاجة جديدة من الحاجت دي لغاية ما يجي شهر رمضان فنكون وصلنا ان ربنا يعتق رقبتنا من النار في الشهر الكريم
o ياعم اجري ده انت حالتك اصعب من حالتي
• لا، انسي مفيش نوم تاني، في شغل، وايه رايك كل زمايلنا يشاركونا ونشجع بعض
o فكرة كويسة بس تتعمل ازاي
• ببساطة كل يوم هرن عليك وقت صلاة الفجر ، وكل يوم ناخد تقرير من بعض عن اللي عملناه ونشوف واحسن واحد فينا يكون له جايزة عندنا
o جايزة ايه
• لما نشوف همتك الأول
o بس الموضوع محتاج تنظيم اكتر
• عشان كده عملنا دورة باسم "إِنِّي ذَاهِبٌ إِلَى رَبِّي سَيَهْدِينِ" هتكون خلال شهر شعبان، وهنظبط فيها كل حاجة مع بعض
o وازي اشترك في الدورة دي
• كل ما عليك انك تدخل علي البلوج ده وتشوف شروط وقواعد الدورة وتشترك فيها
o ان شاء الله اشترك معاكم
• ألحق عشان العدد محدود وباب الحجز 4 أيام فقط
o طيب هات الرابط

إِنِّي ذَاهِبٌ إِلَى رَبِّي سَيَهْدِينِ

ملحوظة هامة: هذه الدورة للرجال فقط.

حفيدات عائشة - الحلقة الثالثة

الحمدلله وكفى وسلام على عباده الذين اصطفى لاسيّما عبده المصطفى...

وبعد اتكلمنا الحلقة اللي فاتت عن دحض مبدأ المساواة بين الرجل والمرأة بالأدلة العقلية، واتفقنا على ان ربنا سبحانه وتعالى من حكمته انه ادي لكل نوع من النوعين مميزات مش موجودة في النوع التاني وياريت اللي مقرأش المقال اللي قبل ده يقرأه

حفيدات عائشة – الحلقة الثانية

أما في الحلقة دي فهنسرد بإذن المولى عز وجل الأدلة من الكتاب والسنة لدحض مبدأ المساواة

يقول رب العزة: { الرِّجَالُ قَوَّامُونَ عَلَى النِّسَاء بِمَا فَضَّلَ اللّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِّلْغَيْبِ بِمَا حَفِظَ اللّهُ} [النساء34]
سبحانك يا رب، قرآنك قاطع الدلالة و واضح المعاني ورغم ذلك لسة فيه ناس بتجادل

التفسير للآية الكريمة من التفسير الميّسر (الرجال قوَّامون على توجيه النساء ورعايتهن، بما خصهم الله به من خصائص القِوامَة والتفضيل، وبما أعطوهن من المهور والنفقات. فالصالحات المستقيمات على شرع الله منهن مطيعات لله تعالى ولأزواجهن، حافظات لكل ما غاب عن علم أزواجهن بما اؤتمنَّ عليه بحفظ الله وتوفيقه)

دليل ثاني
امرأت عمران لما أنجبت السيدة مريم قالت: {فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنثَى وَاللّهُ أَعْلَمُ بِمَا وَضَعَتْ وَلَيْسَ الذَّكَرُ كَالأُنثَى وَإِنِّي سَمَّيْتُهَا مَرْيَمَ وِإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ } [آل عمران36]

وفي تفسير الآية من التفسير المُيّسر (فلما تمَّ حملها ووضعت مولودها قالت: ربِّ إني وضعتها أنثى لا تصلح للخدمة في "بيت المقدس" وقالت: وليس الذكر الذي أردت للخدمة كالأنثى في ذلك; لأن الذكر أقوى على الخدمة وأقْوَم بها, وإني سمَّيتها مريم, وإني حصَّنتها بك هي وذريَّتها من الشيطان المطرود من رحمتك)

دليل ثالث
قال الملك سبحانه: { يَسْتَفْتُونَكَ قُلِ اللّهُ يُفْتِيكُمْ فِي الْكَلاَلَةِ إِنِ امْرُؤٌ هَلَكَ لَيْسَ لَهُ وَلَدٌ وَلَهُ أُخْتٌ فَلَهَا نِصْفُ مَا تَرَكَ وَهُوَ يَرِثُهَا إِن لَّمْ يَكُن لَّهَا وَلَدٌ فَإِن كَانَتَا اثْنَتَيْنِ فَلَهُمَا الثُّلُثَانِ مِمَّا تَرَكَ وَإِن كَانُواْ إِخْوَةً رِّجَالاً وَنِسَاءً فَلِلذَّكَرِ مِثْلُ حَظِّ الأُنثَيَيْنِ يُبَيِّنُ اللّهُ لَكُمْ أَن تَضِلُّواْ وَاللّهُ بِكُلِّ شَيْءٍ عَلِيمٌ} [النساء176]
فللذكر مثل حظ الأنثيين : نص قطعي الدلالة

ورغم ال 3 أدلة دول وانهم ميحتملوش أي معنى تاني إلا ان مُدّعي المطالبة بحقوق المرأة مش ساكتين و ده طبعا راجع لسبب من اتنين يا إما لجهلهم المطبق أو لبغضهم للإسلام ورغبتهم في بعد الناس عن الدين

ولكن زي ما قال لنا حبيبنا وأسوتنا ورسولنا صلى الله عليه وسلم (( ليغشين أمتي من بعدي فتن كقطع الليل المظلم ، يصبح الرجل فيها مؤمنا ، و يمسي كافرا ، يبيع أقوام دينهم بعرض من الدنيا قليل ))
الراوي: عبدالله بن عمر - خلاصة الدرجة: صحيح - المحدث: الألباني - المصدر: صحيح الجامع - الصفحة أو الرقم: 5460

وطبعا مش هيتحققلهم مرادهم أبدا عارفين ليه؟ لأن رسولنا قال (( لا تزال أمة من أمتي ظاهرين على الحق لا يضرهم من خالفهم حتى يأتي أمر الله و هم ظاهرون على الناس))
الراوي: معاوية بن أبي سفيان - خلاصة الدرجة: إسناده صحيح على شرط مسلم - المحدث: الألباني - المصدر: السلسلة الصحيحة - الصفحة أو الرقم: 1971

نسأل الله العظيم رب العرش العظيم أن يجعلنا من هذه الأمة الظاهرة على الحق التي لايضرها من خالفها

نحبكم في الله

والسلام عليكم ورحمة الله وبركاته

نقطة ومن أول السطر .. الحلقة الثالثة .. معينات على التوبة

إن الحمد لله نحمده ونستعينه ونستهديه ونعوذ بالله من شرور أنفسنا وسيئات أعمالنا ونشهد أن لا إله إلا الله وحده لا شريك له وأن محمدا عبده ورسوله وصفيه من خلقه وحبيبه

الحمد لله الذي يأمر بالعدل والإحسان .. ويدعو إلى طريق الحق والإيمان .. فيترصد لابن آدم الشيطان ..فيرسل الله الرسل بالهدي والفرقان..فنبذ ذلك فريق من الذين أوتوا الكتاب وتلبسوا بالكفران..واتبعوا ما تتلوا الشياطين على ملك سليمان.. فرهب الله الناس وأنذر بالضلال من تبدل الكفر بالإيمان .. ورغبهم فقال ولمن خاف مقام ربه جنتان

أما بعد فهذه الحلقة الثالثة لنا في موضوع التوبة وقد تكلمنا سابقا عن علامات قبول التوبة ونسأل الله أن يتوب علينا وعلى كل مسلم عاصي

وقد يقول أحدنا : ( بصراحة أنا مش قادر أتوب .. أنا عمال أتوب وأرجع .. حياتي ضايعة في المعاصي..بصراحة أنا منفعش للطريق دا )

أقول لهذا الشاكي .. أخي ..حبيبي ..لاتمكن الشيطان منك وأستعذ بالله من الشيطان الرجيم وها هي يدي أمدها إليك لتتوب .. لتعود إلى الله ..بل لنتوب سويا ولنعود إلى الله معا

أقدم لك اليوم يا أخي بعض المعينات الي تقودإلى التوبة عسى الله أن يمن بتوبة من عنده

وإليك أخي وأختي بعض الأشياء المعينة على التوبة :

أولا: الدعاء وصدق اللجؤ إلى الله :

وهذا هو أصل المسألة .. فتوكل على الحي الذي لا يموت وأطلب منه التوبة وهنا تنتهي مشكلة العودة بعد التوبة للذنب وهو القائل في القرآن :(.. فَمَن يَهْدِي مَنْ أَضَلَّ اللَّهُ..) الروم 29

والبعض يستهين بالدعاء ويراه شيئا هينا بل وينسى أن الدعاء في الأصل عبادة فالدعاء يكون لحاجة الإنسان لله .. فكيف لا يدعو أحد الله ؟؟ أهناك من لا يحتاج لله ؟؟

وفي الحديث الذي رواه البخاري في الأدب المفرد و صححه العلامة الألباني في صحيح ابن ماجه عن أبي هريرة رضي الله عنه عن رسول الله صلى الله عليه وسلم أنه قال ) من لم يسأل الله يغضب عليه)

وفي الحديث الذي حسنه الشيخ الألباني من حديث ابن عمر رضي الله عنه عن النبي صلى الله عليه وسلم قال : ( الدعاء ينفع ممانزل ومما لم ينزل فعليكم عباد الله بالدعاء )

وقد يقول البعض مالنا ندعو وندعو ولا نجد أي إجابة .. فنرد بحديث رسول الله صلى الله عليه وسلم

ففي صحيح مسلم أن رسول الله صلى الله عليه وسلم قال : ( لا يزال يستجاب للعبد ما لم يدع بإثم أو قطيعة رحم,ما لم يستعجل. قيل: يا رسول الله وما الاستعجال؟ قال:يقول: قد دعوت وقد دعوت,فلم أر يستجاب لي,فيستحسر عند ذلك ويدع الدعاء)

وينبغي لمن يدعو أن يكون حاضر القلب منكسر بين يدي الله مستقبلا للقبلة متطهرا متحريا لأوقات الإجابة فذلك أدعى لأن يجاب دعاؤه

ثانيا: عزل النفس عن مواطن المعصية:

حاول أخي الكريم وأختي الكريمة أن تباعدوا عن المعصية وكل ما يقربكم منها .. أشخاص .. أماكن .. وخصوصا أصدقاء السوأ فهم أكبر الوسائل المعينة للشيطان على إرجاعك لحياة الغي

وقال صلى الله عليه وسلم:" وأمّا جليس السوء كنافخ الكير إمّا أن يحرق ثيابك وإمّا أن تجد منه ريحا خبيثة" أخرجه البخاري (5534) كتب الذبائح والصيد، ومسلم (2628) كتاب البر والصلة

وقال على بن أبي طالب رضي الله عنه : " لا تصحب الفاجر فإنه يزيّن لك فعله ويود لو أنك مثله"

وقد يأتي لك الشيطان ويقول : ( يعني لما تبقى وحش تبقى مع صاحبك ولما تبقى كويس تسيب صاحبك لوحده هي دي الصداقة ؟ طيب خليك معاه وساعده )

نقول : وكيف وأنت يا عبد الله لم تتب بعد ولم تثبت قدمك في أرض الإيمان .. كيف وأنت كنت منذ أيام قلائل ذلك العاصي الذي يتنقل بين أنواع المعاصي المختلفة

إننا حين نقر بأن الله يغفر للتائب ويتوب عليه فهذا لا يتعارض مع كون المعاصي ما زالت لها جذور داخلة متغلغلة تحتاج لأن تعزل حتى لا تجد من يسقيها بماء التزيين فتنبت مرة أخرى .

فليس من المعقول أن من عصى الله في سنين ثم يتوب الله عليه سينسى وستنمحي آثار الذنوب من قلبه ومن داخله بل لها رواسب يجب أن يجهد الإنسان نفسه في إزالتها وهذا ما سيأتي معنا في الحلقات القادمة .

وعلى هذا فالبعد البعد عن مواطن المعصية وأصحابها حتى يحصل لك الطهارة كاملة وتنمحي آثار الذنوب كلها .. وحينها تأتي إلى هؤلاء الذين فارقتهم لا رفيقا في المعصية ولكن {وَدَاعِياً إِلَى اللَّهِ بِإِذْنِهِ وَسِرَاجاً مُّنِيراً }الأحزاب46

والحرص على الصحبة الصالحة ورفقاء الخير فهم الذين تدوم مودتهم إلى يوم القيامة وصدق الله القائل في كتابه :

{الْأَخِلَّاء يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ }الزخرف67

ثالثا : علاج النفس بالصوم :

الصوم من أكبر الوسائل المعينة على الصبر وهو يحفظ الإنسان من نيران الشهوة وواقي للقلب من كثير من سموم الهوى فحاول أن تلزم الصوم بصفة دورية : الثلاث أيام البيض من كل شهر عربي ( 13/14/15) فإن أردت الزيادة فالاثنين والخميس من كل أسبوع .. فإن أردت الزيادة فصم يومأ وأفطر يوما وهذا خير الصيام .

رابعا :تذكر الموت :

ونريد أن يتغير أيضا فكرنا في موضوع التذكير فليس التذكير بعبارات لا تكاد تجاوز الحناجر ( كلنا هنموت .. كله فاني ولا دايم إلا وجه الله ) بل نريد ذكر للموت بالقلب .

تفكر في الموت بأنه الفاصل بينك وبين الجنة .. نعم الجنة .. فأنتا تشتاق إليها ولكن يمنعك منها الموت .. فادعو الله أن يعجل لك يالجنة وقد يقول قائل وهل أعمالي هذه تبلغني الجنة .. فنقول إذا فاستعد للحظة الموت بالأعمال التي تدخلك الجنة .. استعد بالزاد الذي إذا عبرت من شاطئ الحياة الدنيا إلى شاطئ الحياة الآخرة كنت من الفائزين .. فلتجعل تذكرك للموت على أنه الجسر الذي يعبر بك بين الشاطئين وأنت سائر إليه لا محالة فتزود في طريقك قبل بلوغ الجسر

خامسا : تذكر عاقبة المعصية :

وتذكر عواقب المعصية من الأشياء التي قد تردع الإنسان عن فعل المعاصي والموبقات وقد ذكر ابن القيم في كتابه القيم :الجواب الكافي لمن سأل عن الدواء الشافي ( الداء والدواء ) عقوبات المعاصي فذكر أن المعصية تضعف التوبة وتهتك ستر الله تعالى عن العبد وتهون العاصي على الله سبحانه وتعالى وتقصر العمر وتمحق بركته وتورث الذل وتطفئ نور العقل وتدخل العبد تحت لعن الله عز ورجل ورسول الله صلى الله عليه وسلم وتسبب الخسف والزلازل وتفسد الأرض و تذهب الحياء وتضعف في القلب تعظيم الرب وتستجلب نسيان الله للعبد وتخرج صاحبها من دائرة الإحسان وتحرم رفقة المؤمنين وتزيل النعم وتحق النقم وتعوق سير القلب إلى الله تعالى وتوقع في القلب الوحشة وتمرض القلوب وتعمي البصيرة وتصغر النفوس وتسقط كرامة العبد عند الله وعند خلقه وتمحق البركة وتجعل صاحبها من السفلة وتجرئ على الإنسان أعداءه وتنسي العبد نفسه والأخطر من ذلك كله أنها تجلب معصية أخرى وكل هذا بخلاف العقوبات الشرعية على المعاصي

فتخيل أخي الكريم بنظرة إلى متبرجة يحدث لك كل هذا .. إذا تفكر في ذلك جيدا قبل أن تنظر حينها ستتردد كثير وكثيرا قبل أن تفعل

وأنت اختنا الغالية تخيلي أنك بخروجك بدون حجاب شرعي سيحدث لك كل هذا ؟ هل ستظلين إذا على ما أنت عليه ؟

سادسا: انصر الله ينصرك :

هذه طريقة عملية رائعة استدلالا من قول الله تعالى {يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُمْ }محمد7

فمن يشتكي من الهزيمة أما النفس والشيطان فلينصر الله كيينصره الله

وهنا يأتي السؤال كيف ننصر الله ؟

نقول نصرة الله تكون بنصرة دينه في الأرض .. فمثلا .. جرب أن تضع مصحفا في مسجد أن تعطي أحد شريطا عليه أحد الدروس الدينية القيمة .. تذكر الناس بسنة منسية أوتساعدهم على فعلها كأن توزع ( السواك ) ..تذكر الناس بأوقات الصلاة .. وهكذا

غير أن هذا وحده لن يكفي إذا لم يكن من الأصل عندك استعداد للتوبة.

وهكذا فهذه الاسباب وغيرها الكثير من المعينات على التوبة نسأل الله أن يتوب علينا جميعا وأخيرا وقفة أخيرة

اعلموا أيها الإخوة والأخوات أننا وإن أطلنا في موضوع تلك النقطة لأن وضع نقطة قبل البداية من أول السطر هو أهم شئ

فلو لم تكن تلك النقطة فاصلة حاسمة فلن يختلف الأمر كثير قبل السطر من بعده .

واعملوا أيضا أنه بعدما نكون إن شاء الله قد جددنا توبتنا وثبتناها وعالجناها خلال هذه الحلقة وسابقتها .. فالعمل بعد التوبة يبدأ منذ المرة القادمة

أخوتي شمروا عن ساعد الجد فالعمل سيبدأ من المرة القادمة إن شاء الله

لا تنسوني من الدعاء

من فضائل القرآن وسوره وآياته - الحلقة الثالثة

السلام عليكم ورحمة الله وبركاته

الحمد لله رب العالمين والصلاة والسلام علي أشرف الأنبياء والمرسلين وبعد ...

علي الطريق نمضي يقسو علينا زادنا وما أملنا إلا في غايتنا ... إلي الجنة نمضي يقودنا كلام ربنا ونقوي بثمار حديث نبينا صلي الله عليه وعلي آله وصحبه وسلم.

إكرام صاحب القرآن إجلال لله عز وجل
قال رسول الله صلى الله عليه وسلم: (( إن من إجلال الله إكرام ذي الشيبة المسلم، وحامل القرآن غير الغالي فيه، والجافي عنه، وإكرام ذي السلطان المقسط )) حديث حسن رواه أبو داود في سننه.

خير الناس
قال رسول الله صلى الله عليه وسلم (( خيركم من تعلم القرآن وعلمه )) رواه البخاري في صحيحه.

القرآن قائد إلي الجنة
قال رسول الله صلى الله عليه وسلم (( القرآن شافع مشفع وماحل مصدق من جعله إمامه قاده إلى الجنة ومن جعله خلف ظهره ساقه إلى النار )) [صحيح - السلسلة الصحيحة 2019]

الملائكة تتنزل لقراءة القرآن
عن البراء بن عازب رضى الله تعالى عنه قال بينما رجل من أصحاب النبي صلى الله عليه وسلم يقرأ وفرس له مربوط في الدار فجعل ينفر فخرج الرجل فنظر فلم ير شيئا وجعل ينفر فلما أصبح ذكر ذلك للنبي صلى الله عليه وسلم فقال (( السكينة تنزلت بالقرآن )) رواه البخاري في صحيحه.

مهرها القرآن
عن سهل بن سعد الساعدي قال أتت امرأة النبي صلى الله عليه وسلم فقالت: إنها قد وهبت نفسها لله ولرسوله صلى الله عليه وسلم، فقال صلي الله عليه وسلم: (( ما لي في النساء من حاجة )). فقال رجل: زوجنيها، فقال صلي الله عليه وسلم: (( أعطيها ثوبا )). قال الرجل: لا أجد، فقال صلي الله عليه وسلم: (( أعطها ولو خاتما من حديد )). فاعتل له، فقال صلي الله عليه وسلم: (( ما معك من القرآن )). قال: كذا وكذا، فقال صلي الله عليه وسلم: (( فقد زوجتكها بما معك من القرآن )) رواه البخاري في صحيحه.

كيف تنهض الأمة؟
قال رسول الله صلى الله عليه وسلم (( إن الله يرفع بهذا الكتاب أقواما ويضع به آخرين )) رواه مسلم في صحيحه.

بهذا نكون قد سردنا ما جاء من أحاديث عن النبي صلي الله عليه وسلم في فضائل القرآن الكريم عامة وبداية من الحلقات القادمة نسرد ما جاء من أحاديث في فضائل السور والآيات.
جزاكم الله خيراً.
والسلام عليكم ورحمة الله وبركاته.

استراحة المحبين

== استراحة المحبين ==

مشتــــــــــــــاق

شخص ببصره إلى السماء وهو مدرج في دمائه وأنفاسه تتلاحق وبداخله ألف ألف سؤال وألف ألف أمنية ولكن وسط كل هذا كان يراوده حلم عمره .. قصة عمره .. حبيبته .. أطال النظر إلى السماء وهمس يناجيها

- حبيبتي ..أمنية عمري وملكة أحلامي
كم أشتاق إليكِ الآن
الآن وقد بلغت آخر ما يمكنني أن أبلغه
طال بي المسير .. واشتد بي السفر الطويل
وكم تأكل نار الشوق في جدران قلبي .. قلبي الذي يحترق من حرارة ذكرى لقياكِ
آه لو تعلمين كم أحن إليك ِ
سنين من التعب تعانق أيامي ترفض أن تتركني إلا عند بابك ِ
متى اللقاء يا حبيبتي ؟؟
متى اللقاء لأبث لكِ همي وألقي إليكِ متاعبي ؟؟
كم أتوق أن ألقي برأسي على كتفيك طفل صغير أحدثكِ عن أيام العذاب وسنين الشقاء
كم ظللت أرتجف وحدي في ليالي الشتاء ممنيا نفسي بحرارة لقائنا
كم احترقت في نار الشمس راغبا في أن أستظل بأهدابك
كم سهرت أقاتل النوم معزيا نفسي بأنه سيأتي يوم وأنام في عينيكِ
كلما اشتد بي الألم من الجهد اشتد بي الشوق من الذكرى
فحبك ملك مشاعري واستولى على أحاسيسي وصادر أشواقي وسرق مني غرامي
والآن .. وقد بلغ مني العناء ما بلغ
وها أنا ذا وكل موضع في جسدي يبكي دما من شدة الألم
تتبادر أمامي كل الأسئلة
هل حان حقا اللقاء ؟؟
هل تنتظريني ؟
والسؤال الأهم
هل أنتِ لي حقا ؟؟

لم يستطع أن يقاوم آلامه أكثر من ذلك فدخل في غيبوبة قصيرة وما لبث أن رآها أمامه .. كأجمل مما كان يتصور أو يتخيل .. رنت نحوه هامسة

- حبيبي .. وهل أنا إلا لك ؟!!
أنا لا أرضى إلا بمثلك .. فأنا لا أرضى إلا بالفرسان الأبطال
منذ بدء الكون وأنا أتزين لك وأستعد لللقاء ..لم يراني أحد قبلك
أنا لك يا حبيبي .. لك وحدك
هناك في أجمل مكان في الوجود
هناك حيث أنهار العسل واللبن
هناك حيث ما لا عين رأت ولا أذن سمعت ولا خطر على قلب بشر
هناك حيث تراب الزعفران
هناك نلتقي .. وأغني لك بنفسي .. وبصوتي .. أغني لك وأقول
نحن الراضيات فلا نسخط أبدا، و نحن الخالدات فلا نموت أبدا ، و نحن الشابات فلا نهرم أبدا ، و نحن الكاملات فلا نتغير أبدا ، و نحن الصادقات فلا نكذب أبدا ، و نحن الطيبات فلا نفثل أبدا ، و نحن خيرات حسان أزواج قوم كرام طوبى لمن كنا له و كان لنا

هاهو اللقاء قد حان .. الآن يا حبيبي الآن

استفاق من غيبويته وأشتد تلاحق أنفاسه و تصبب العرق من جبهته بغزارة وأيقن هو أن اللقاء قد حان .. نعم الآن .. الآن
رفع سبابته إلى السماء وقال :
أشهد أن لا إله إلا الله وأشهد أن محمدا رسول الله

قالها وفاضت روحه إلى بارئها .. وعلى شفتيه ابتسامة هادئة ولكن ليست كأي ابتسامة
إنها ابتسامة مشتاق

***************

من طرائف الدروس

مفاجأة .. الإمام اختفى .. للشيخ محمود المصري حفظه الله

http://www.islamway.com/?iw_s=Lesson&iw_a=view&lesson_id=45781

***************

دمعة لله

الله أكبر .. ثبات أخت منتقبة .. للشيخ محمد حسان حفظه الله

http://www.islamway.com/?iw_s=Lesson&iw_a=view&lesson_id=46120

***************

تلاوة متميزة

تلاوة مبكية للشيخ ناصر القطامي حفظه الله .. سورة القيامة

http://way2gana.net/sup/telawa/variety/qtamy_qyama.rm

**************

اخترنا لك

مقال : عشرة حجب بين العبد وربه

http://www.kalemat.org/sections.php?so=va&aid=461

نشيد : أنا الفقير .. للشيخ صلاح الهاشم حفظه الله

http://www.ma3ali.net/audio/files/nasheed//tape/atyto/4.rm

درس : ملكش حجة .. للشيخ هاني حلمي عبد الحميد

http://www.islamway.com/?iw_s=Lesson&iw_a=view&lesson_id=56917

**************

وفي الختام تقبلوا تحياتنا ونستأذنكم في التوقف لفترة قصيرة لظروف الامتحانات ونسألكم الدعاء

حفيدات عائشة - الحلقة الثانية

الحمد لله رب العالمين والعاقبة للمتقين ولاعدوان إلا على الظالمين والصلاة والسلام على المبعوث رحمة للعالمين…..

وبعد

اتكلمنا الحلقة اللي فاتت عن قيمة وأهمية المرأة في المجتمع المسلم وعن قيمة المرأة عند غير المسلمين وقلنا اننا ان شاء الله تعالى هنسرد شبهات أعداء الدين حول المرأة وهنبتدي بحول الله وقوته نتكلم عن نكتة المساواة

هي فعلا نكتة

ونكتة تضحك أوي كمان

ويا أخواتي ياريت تكملوا كلامي للآخر وهتعرفوا ليه المناداة بالمساواة أنا قلت عليه نكتة

أنا هضرب مثل صغير

لو انتي مدرّسة في مدرسة

ومطلوب منك انك تشرفي على 3 طالبات علشان تزيين الفصل وتجميله لاستقبال ضيف مهم

وكل طالبة من الطالبات ليها صفة غير التانية

الطالبة الأولى : طويلة

الطالبة الثانية : رشيقة

الطالبة الثالثة : فصيحة اللسان

والمهام المطلوبة هي : تنظيف الفصل، الصعود على الكراسي وتعليق الزينة، إلقاء كلمة ترحيب بالضيف

ياترى هتختاري مين انه يطلع على الكراسي ويعلق الزينة؟

أكيد هتختاري الطالبة الطويلة

ومين للتنظيف؟

أكيد هتختاري الطالبة الرشيقة

ومين لإلقاء كلمة الترحيب؟

أكيد الطالبة الفصيحة

طيب معنى كده اننا هندّي كل طالبة المهمة اللي تناسب قدراتها من غير ظلم لأي واحدة منهم

ومينفعش أصلا نقارن بين التلات بنات إلا لو هنقارن بآداء كل واحدة في مهمتها يعني واحدة أدت مهمتها بنسبة 90% والتانية بنسبة 100% وهكذا

وبالمثال ده يسقط أصلا مبدأ المساواة بين الرجل والمرأة لأن كل واحد له وظيفته المختلفة والاتنين بيكملوا بعض

ربنا سبحانه وتعالى ادى للرجال قوة بدنية و عاطفة بسيطة وميزات تانية مش موجودة في المرأة

وكمان ربنا إدى للمرأة عاطفة قوية جدا وقوة بدنية بسيطة وميزات تانية كتير مش موجودة في الرجل

وبسبب كده كانت المرأة أقدر من الراجل على حضانة وتربية الأولاد وغمرهم بالحب والعطف أكتر من الرجل

وكذلك المرأة أقدر من الرجل على تدبير أمور المنزل

وكذلك كان الرجل أقدر من المرأة على العمل المستمر والتعامل مع الظروف المختلفة لأي عمل

كذلك يا أختي ربنا سبحانه وتعالى كلّف الرجل بأشياء ثقيلة لاتحتملها المرأة كالجهاد في سبيل الله والخروج في شدة الحر أو شدة البرد للصلاة في المسجد

وفي نفس الوقت ربنا سبحانه وتعالى خفف على المرأة في الصوم والصلاة فصلاتها في البيت أفضل لها وحتى في الحج إن ملكت المرأة أموال الدنيا ومكانش معاها محرم ( محرم معناها رجل من محارمها يعني أبوها – أخوها – ابنها ) يصونها ويرعاها تسقط عنها فريضة الحج

ممكن حد ييجي في باله طب ليه الإسلام خلى نصيب المرأة من الميراث نصف ميراث الرجل

برضه محتاجين مثال صغير نوضح بيه

نفرض إن رجل من المسلمين مات وكان ورثته ابن وابنة

وكانت التركة مثلا 150 ألف

الولد هياخد 100 ألف والبنت هتاخد 50 ألف

طيب بعد سنة البنت اتجوزت وزوجها ادالها 10 آلاف مهر و5 آلاف شبكة

كده البنت بقى معاها كام؟

65 ألف ولو قلنا انها شاركت في تجهيز الشقة مثلا ب20 ألف يبقى اتبقى معاها 45 ألف

( البنت أصلا مش فرض عليها انها تشارك بالمال في تأسيس البيت أو تجهيزه وكل ده بيبقى على العريس لكن ان شاركت يبقى ده تفضلا منها)

طيب الولد أخوها بعد سنتين راح اتجوز ودفع 10 آلاف مهر و5 آلاف شبكة لعروسته

وطبعا العريس عليه تجهيز الشقة بقدر أكبر بكتير من العروسة - لو هي شاركت - يبقى هنقول مثلا انه هيدفع 80 ألف

يبقى كده اتبقى معاه كام من الميراث؟

5 آلاف بس هما اللي هيتبقوا

في حين ان أخته اتبقى معاهه من الميراث 45 ألف

يبقى كده هل فيه ظلم واقع على المرأة؟؟؟؟؟؟؟؟؟؟

يا أخواتي لازم نعرف ان الله حكم عدل ولايظلم مثقال ذرة وكل شئ شرَعَهُ الملك القدير فهو لحكمة ممكن نعرفها وممكن منعرفهاش

عذرا إن واحد زيي يتكلم في موضوع من المواضيع الكبيرة دي لكن أنا قلت الكلام اللي أنا اقتنعت بيه وبحاول إني أوصله لأي حد عنده الشبهة دي

انتظرونا في استراحة الروضة

نحبكم الله

والسلام عليكم ورحمة الله وبركاته

نقطة ومن أول السطر .. الحلقة الثانية ===> علامات على الطريق

بسم الله الرحمن الرحيم

والصلاة والسلام على المبعوث رحمة للعالمين

سيد الأولين والآخرين

قائد الميامين المحجلين

سيدنا محمد عليه أفضل الصلوات وأتم التسليم

الحمد لله .. رب الأرض قدر فيها أقواتها .. وبث فيها من كل دابة ماهو آخذ بناصيتها .. ينصر المؤمنين فلا تزل قدم بعد ثبوتها .. فاسأل يوسف كيف فر من الدنيا وزيناتها .. فاستعصم إذ راودته التي هو في بيتها .. وعاتب ربك القلوب على سباتها .. ثم أفرحها فقال : أعلموا أن الله يحي الأرض بعد موتها

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ{16} اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ{17}

أما بعد .. تكلمنا في المرة السابقة عن التوبة واسأل الله أن يتوب علينا جميعًا وأن يقبل توبتنا

وربمايتساءل أحدنا كيف أعلم أن الله قد قبل توبتي ؟؟

فنقول علامات التوبة المقبولة كالآتي :

أولا: أن يكون بعد التوبة خيرا مما كان قبلها

وهذا شرط معروف بالفطرة فإذا لم تكن حياتك بعد التوبة أفضل مما كانت قبلها فمن ماذا تبت يا عبد الله ؟

ثانيا: ألا يزال الخوف من العودة الى الذنب مصاحبا له

وهذا هو حال عباد الله المؤمنين فكل مؤمن يستعظم ذنبه ويخشى أن يعود له لما علم من قبح ما كان عليه فكلما ذكر حاله قبل التوبة شعر بخجل مما كان عليه وساء بما حدث له وهذا عكس ما تجده من بعض المفتونين إذ يقول : ( أنا لو كنت زي زمان كان زماني ايه .. لو كنت لسه بغني كنت عملت شريط كسر الدنيا .. تعرف لو ليا في البنات زي زمان كان زماني ماشي مع عشرة ولا عشرين .. أنا لو كنت من غير حجابي زي الأول كان كل دول باتوا يفكروا فيا .. وهكذا ) .. فاعلم أن مثل هؤلاء مادام ذكرهم للذنب يثير اللذة داخلهم فهم واقعون فيه مرة أخرى لا محالة .

ثالثا: انخلاع القلب وتقطعه ندما وخوفا من العقوبة العاجلة والآجلة

قلبه خائف من عاقبة الله فيما مضى منه ..فهذا الحسن البصري ومن هو في العبادة والزهد كان يقول : أخشى أن يكون الله قد أطلع على بعض ذنوبي فقال أذهب فلا غفرت لك

وهذا مالك بن ديناركان يقول :

إذا حشر الله الخلائق فقال : يا مالك .. قلت ربي لبيك .. فيأذن لي أن أسجد بين يديه .. فلا أرفعها حتى أعلم أنه قد رضي ثم لا أبالي إن قال أذهب يا مالك كن ترابا .. كن ترابا

مالك بن دينار الذي كان إذا شرع في قيام الليل كبر تكبيرة الإحرام ثم يبكي حتى يطلع الصباح

فكيف بالمفرطين أمثالنا ؟؟

رابعا : كسرة خاصة لا تحصل الا للتائب

التائب يعرف أنه أفاق لتوه من غفلة .. وأدرك أخيرا حجم ما كان عليه من تفريط .. فهو مقر بحقيقة معاصيه فتجد قلبه منكسرا ذليلا على ما كان منه .. يود لو أن ما كان لم يكن .

ومن أجمل ما قيل عن التائب ماقاله الشيخ محمد حسين يعقوب في كتابه كيف أتوب حيث قال===>

التائب.. له في كل وقعة عبرة.. إذا رأى جمعا ذكر القيامة.. وإذا رأى مذنبا بكى عليه خوفا من ذنوبه..

إذا رأى نعيما خاف أن يحرم الجنة.. وإذا رأى نارا ظن أنه مواقعها..

التائب.. إذا هدل الحمام بكى.. وإذا صاح الطير ناح.. وإذا شدا البلبل تذكّر.. وإذا لمع البرق اهتز قلبه خوفا ممن يسبح الرعد بحمده والملائكة من خيفته..

التائب.. ـ إخوتاه ـ يجد للطاعة حلاوة.. يجد للعبادة طلاوة.. يجد للإيمان طعما.. يجد للإقبال لذة..

التائب .. يكتب من الدموع قصصا.. وينظم من الآهات أبياتا.. ويؤلف من البكاء خطابا..

التائب.. كالأم اختلس منها طفلها.. ثم اختلست طفلها من يد الأعداء.. أتدري كم فرحتها..؟؟ أتقدر سعادتها..؟؟

التائب.. كالغائص في البحر.. إذا نجى من اللجة الى الشاطئ.. بعد أن آيس من النجاة..

التائب.. كالعقيم بشر بولد..

التائب.. أعتق رقبته من أسر الهوى.. أطلق قلبه من سجن المعصية..

التائب.. فك روحه من شباك الجريمة.. أخرج نفسه من كير الخطيئة.. التائب ـإخوتاه ـ كالطائر الجريح لا يختال..

لو رأيت التائب لرأيت جفنا مقروحا.. نبصره في الأسحار على باب الاعتذار مطروحا.. سمع قول الاله يوحى فيما يوحى{ يا أيها الذين آمنوا توبوا الى الله توبة نصوحا} [ التحريم: 8].

التائب... مطعمه يسير.. حزنه كثير.. كأنما هو أسير.. قد رمي مطروحا.. فتاب الى الله توبة نصوحا..

التائب.. قد نحل بدنه الصيام.. أتعب قدمه القيام.. حلف بالعزم على هجر المنام.. فبذل لله جسما وروحا.. وتاب الى الله توبة نصوحا..

التائب.. الذل قد علاه.. والحزن قد وهاه.. يذم نفسه على هواه..وبذلك صار عند الله ممدوحا.. لأنه تاب الى الله توبة نصوحا..

أخي اصدق نفسك وربك .. هل تبت حقا ؟؟

فإذا لم تتب فارجع إلى الله وعد وتب مرة ثانية فإن الله يحب التوابين .. تب إلى الله واستعن به على نفسك ..

لا تيأس من نفسك فإنه لا ييئس من روح الله إلا القوم الكافرون وإن تصدق الله يصدقك ونختم بهذا الحديث :

عن شداد بن الهاد الليثي قال :

أن رجلا من الأعراب جاء إلى النبي صلى الله عليه وسلم ، فآمن به واتبعه ، ثم قال : أهاجر معك ؟ فأوصى به النبي صلى الله عليه وسلم بعض أصحابه ، فلما كانت غزوة غنم النبي صلى الله عليه وسلم سبيا ، فقسم ، وقسم له ، فأعطى ما قسم له ، وكان يرعى ظهرهم ، فلما جاء ، دفعوه إليه ، فقال : ما هذا ؟ قالوا : قسم قسمه لك النبي صلى الله عليه وسلم ، فأخذه ، فجاء به إلى النبي صلى الله عليه وسلم ، فقال : ما هذا ؟ قال : قسمته لك . قال : ما على هذا اتبعتك ، ولكني اتبعتك على أن أرمى إلى ههنا ، وأشار إلى حلقه بسهم فأموت ، فأدخل الجنة ، فقال : إن تصدق الله يصدقك . فلبثوا قليلا ، ثم نهضوا في قتال العدو ، فأتى به النبي ، يحمل قد أصابه سهم حيث أشار ، فقال النبي : أهو هو ؟ قالوا : نعم ! قال : صدق الله فصدقه . ثم كفنه النبي ، في جبة النبي ، ثم قدمه فصلى عليه ، فكان فيما ظهر من صلاته : اللهم هذا عبدك ، خرج مهاجرا في سبيلك ، فقتل شهيدا ، أنا شهيد على ذلك
الراوي: شداد بن الهاد الليثي - خلاصة الدرجة: صحيح - المحدث: الألباني - المصدر: صحيح النسائي - الصفحة أو الرقم: 1952

أرأيت كيف من يصدق الله يصدقه .. اصدق في التوبة إلى الله يصدقك الله ويتوب عليك

اللهم وقع على قصص الإنابة بقلم العفو

اللهم اقبل طلاب الجنة في مدرسة التوبة

اللهم ارفق بمرضى الهوى في مستشفى البلاء

لا تنسوني من الدعاء غفر الله لي ولكم

هذا وإن كان من توفيق فمن الله وحده وماكان من سهو أو خطأ فمني ومن الشيطان

سبحانك اللهم وبحمدك نشهد أن لا إله إلا أنت نستغفرك ونتوب إليك

لاتنسوا موعدكم مع الحلقة الثانية من سلسلة حفيدات عائشة الثلاثاء القادم 21 ربيع الاخر 1428 هجرياً

من فضائل القرآن وسوره وآياته - الحلقة الثانية

السلام عليكم ورحمة الله وبركاته

الحمد لله رب العالمين والصلاة والسلام علي أشرف الأنبياء والمرسلين وبعد ...
وعلي الطريق إلي مرضاة الله نسير معا نتزود بخير زاد كلام الله ونستأنس بخير حديث ماجاء عن رسول الله صلي الله عليه وعلي آله وصحبه وسلم.

قال رسول الله صلى الله عليه وسلم (( الماهر بالقرآن مع السفرة الكرام البررة والذي يقرأ القرآن ويتتعتع فيه وهو عليه شاق له أجران )) رواه البخاري ومسلم واللفظ لمسلم.

الماهر بالقرآن هو الذي يقرأ كلام الله علي الوجه الأكمل الذي جاء عن رسول الله صلي الله عليه وسلم فهو يقرأه بأحكام تلاوته دون خطأ أو زلل وسأل الإمام علي رضي الله عنه عن قراءة القرآن بطريقة صحيحة فقال تجويد الحروف ومعرفة الوقوف، فالذي يفعل ذلك هو مع السفرة الكرام البررة وهم الملائكة. والبشري تأتي لمن لم يقدر علي ذلك ويحاول المحاولات تلو المحاولات حتي يقرأ كلام الله علي الوجه الأكمل ولكنه لا يستطيع فذلك له أجران القراءة والمجاهدة.

قال رسول الله صلى الله عليه وسلم (( يُقال لصاحب القرآن اقرأ وارتق ورتل كما كنت ترتل في الدنيا فإن منزلك عند آخر آية تقرؤها )) حديثٌ حسنٌ صحيح رواه أبو داود في سننه.

يُقال عند دخول الجنة لصاحب القرآن الذي كان يلازمه بالتلاوة والعمل اقرأ وارتق في درجات الجنة ومراتبها ورتل كما كنت ترتل في الدنيا واستمتع بهذه القراءة في الجنة التي ماهي إلا للتلذذ كما كنت ترتل في الدنيا القرآن وتجيد قراءته. فإن منزلك مكانك ودرجتك ومرتبتك في الجنة عند أخر آية تقرؤها أي بقدر ما قرأت من آيات وعملت بها.

قال رسول الله صلى الله عليه وسلم (( مَنْ قَرَأَ حَرْفَاً مِنْ كِتَابِ الله فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لاَ أَقُولُ آلم حَرْفٌ، وَلَكِنْ أَلِفٌ حَرْف ولامٌ حَرْفٌ وَميمٌ حَرْفٌ )) حديثٌ حسنٌ صحيح رواه الترمذي في جامعه.

هذا الحديث من أكثر الأحاديث التي تدل علي فضل الله علي عباده. فبكل حرف تقرأه من كتاب الله تأخذ عشر حسنات والله يضاعف لمن يشاء. بعد قراءتك لكلام الله أحسب عدد الصفحات التي قرأت مضروباً في عدد السطور في الصفحة وليكن 15 كما في غالب المصاحف مضروباً في متوسط عدد الحروف لكل سطر 40 حرف تقريبا مضروباً في 10 حسنات فإذا كانت قراءة سطر واحد تساوي 400 حسنة أو أكثر وقراءة صفحة واحدة تساوي 6000 حسنة أو أكثر فلا تضيع كل هذه الحسنات.

الحديث عن فضائل القرآن لا يتنهي، لذا نكمل في الحلقة القادمة.

لاتنسوا موعدكم مع
الحلقة الثانية من سلسلة
نقطة ومن أول السطر
يوم السبت القادم
18 ربيع الاخر 1428 هجرياً

جزاكم الله خيراً.
والسلام عليكم ورحمة الله وبركاته.

استراحة المحبين

== استراحة المحبين ==

صور من الحياة

في هذا العصر .. أصبحنا نرى العجائب مما يندى له الجبين ويأبى العبد قبل الحر في إقراره أو قبوله .. ومن خلال صور من الحياة نعرض لكم هذه الصور المبتذلة لبعض المخربين في مجتمعنا الإسلامي وعرضنا هنا لهم ليس لمجرد التعريض بالبعض خصوصا أاننا نرفض هذه الصور في كل مقالات مدونتنا ..كما نرفض سياسة المناطحات والمشاحنات الفارغة .. ولكننا نعرضه من باب ( وبضدها تتميز الأشياء ) .. فيجب ألا نغفل ونحن نعيش في روضتنا هنا .. أن هناك مستنقاعات من الرذيلة تملأ الأرض من حولنا

أعزائنا المشاهدين من قناتنا الفضائية اللولبية نقدم لكم اليوم في برنامجنا ( تفاهة شو ) ضيف روش طحن هيعجبكم موت موت موت .. ولأنكم مش معقدين زينا والحياة فري وكله بيطلع في الغسيل فقلنا كل يوم أغاني زهقنا .. كل يوم ممثلين زهقنا .. كل يوم أفلام .. زهقنا عايزين تجديد .. قلنا النهاردة نجيب شئ جديد انما ايه جامد طحن .. عارفين هو ايه .. لا مش هقولكم .. طيب اتحايلو عليا شوية .. طيب علشان خاطر ميمي وسوسو .. وحمادة .. وتامر وزازو الي منفضاله اليومين دول وما بردش عليه .. أنا هقولكم علشان أنا بس عايزة أصالح زازو
يسقف الجمهور القابض مرة واحدة وكأنها ألقت خطبة حماسية وتتظاهر هيا بالتأثر من إعجاب الجمهور بكلامها .. حاجة تحسسك انهم فاكرين المشاهدين هبل .. أو ان البرنامج بيعرض للمكفوفين
النهاردة معادنا مع المفكر الإسلامي / راضي موافق مقتنع الحاصل على 5 دكتوراه في أثر أحمر الشفايف على صراع الحضارات .. و6 دكتوراة في ضرورة إدخال التغيير على الفكر الإسلامي في ظل المانيكير وما ننساش رسالته الي خد عليها جايزة الأم المثالية سنتين على التوالي : شرح أثمن الأوقات .. في فضل القعدة مع الستات
طبعا بتقولوا مفكر إسلامي يعني حلقة غم .. لا دا لذيذ خالص وروش طحن دا فظيع مابطلتش ضحك بسببه من ساعة ماجه دمه شربات ونكته عسل دا حتى قالي نكتة دلوقتي .. بيقول مرة واحد ك... ولا بلاش علشان ما ينفعش تتقال في التليفزيون
المهم طبعا لاني دكتورة كبيرة ( وطبعا انتوا من ساعة ما شفتوا خلقتي بتقولوا دكتورة في ايه ) فكان لازم استضيف واحد من مقامي علشان انا ما بلمش والمفكر الإسلامي راضي .. يخرب بيت تفكيره بجد فظيع كان تايه عننا فين دا عموما علشان ما اطولش عليكم ( ليه ما لسه بدري ) أقدملكم المفكر الإسلامي / راضي موافق مقتنع

الدكتورة : دكتور راضي أهلا بيك
تلتفت الكاميرا لدكتور راضي لتجد شاب في العشرينات مسقط البنطلون تي شيرته مرفوع لغاية رقبته ولابس حظاظة ويمضغ اللبانة بشكل ولا بلاش.. والحمد لله انه لابس لون غير الدكتورة وإلا كنا هنتلغبط كتير في الحلقة
دكتور راضي : هاي عليكي وعلى كل المسلمين الي منورينا .. وكل المسلمات الحلوين الي زيك يا قمر
الدكتورة ( وهيا بتبتسم وتمثل انها مكسوفة ( لا حول ولا قوة إلا بالله ودا جالها منين الكسوف دا ) ): ميرسي يا دكتور دمك خفيف يا مضروب
الدكتور (بعد ما حس ان العملية ماشية حلاوة ) : انتي الي دمك شربات يا قطة
وفي اللحظة دي وفي حجرة التحكم ينفجر المخرج من الغيظ و يصرخ في ودن المذيعة ويقول
المخرج : يا دكتوره ما ينفعش كده منظري وحش قدام الجمهور .. ما أنزلكم اتنين ليمون وشجرة
تفوق الدكتورة مرة واحدة وتتظاهر بالجدية
الدكتورة : د. راضي .. بصفتك دكتور إسلامي كبير رايك ايه في أهم القضايا دلوقتي على الساحة المفروض نتكلم فيها
ينطلق بسرعة البرق وكانه لقى لقية
د. راضي : الستااااااااااااااااااااااااااااااااااات .. ( يبدأ ياخد باله إنه اتقفش فيهدي صوته ويمثل التأثر بقضايا الأمة ويكمل ) .. أيوة الستات هما نص المجتمع لا .. دول مجتمع ونص .. الستات هما أصل المجتمع الإسلامي .. هما النص الحلو .. وأنا الصراحة الدكتور مانعني من الحادق علشان كده مركز معاهم قوي
الدكتورة : د. راضي تحب تقول ايه للمرأة المسلمة في وسط صراع الطبقات و هجوم العولمة وأنفلونزا الطيور و العمليات الفدائية للمقاومة في العراق.. وقصة الحب الي بين سعد الصغير والحمار .؟

تقول الكلمتين الي حفظوهالها وتأخذ نفسا عميقا وهيا تلعن المعد ألف مرة في سرها
د. راضي : باختصار هما كلمتين بساط
أختي في الله .. هاي عليكي
حبيبة قلبي من جوا وعينيا الي بشوف بيهم
من أجل ازدهار الإسلام
أحب اقولك يا عصفورتي .. انتي الي فيهم والباقي سلطة
ولاد ال ... عايزين يفهموكي ان الإسلام حجاب ونقاب وصلا وقرآن وكلام من دا وما تسلميش على دا وما تكلميش دا
طيب ولو سمعنا كلامهم .. يجيبلك كبت ؟؟ بعد الشر عليكي .. إن شاء الله الي يكرهوكي
الحجاب يا قطة .. حجاب القلب .. ومادام القلب أبيض والمزاج رايق يبقى ايه المشكلة؟
وطبعا هيقولولك مفيش بقى تكلمي ولاد ولا حد يقولك كلام حلو ولا حاجة
طيب دا اسمه كلام
هو إنتي لا سمح الله طالبة شئ حرام .. دا انتي بنت ونفسك في شوية اهتمام
علشان كده هنهتم إحنا بيكي .. بس اهتمام إسلامي من الي قلبك يحبه
تسبيلة إسلامية ليكي مننا من أجل مستقبل أفضل للأمة
همسة حب خاشعة .. ليكي من أجل الوحدة العربية
وردة حب وشوق وهيام وغرام وإلهام وابتسام علشان الأمة تعيش
وإن شاء الله ما عاشت
المهم انتي يا حبيبتي
علشان كده احنا مش عايزين نضايقك ولا نعكر مزاجك
احنا بس مهمتنا إن أحوال الأمة تتعدل ومش هتتعدل غير بيكي
عايزة تخرجي من البيت حقك .. مين الي قالك تقعدي .. الإرهاابيين الاشرار صح ؟؟ ..اخص عليكوا .. امشوا يا وحشين
طبعا يا حبيبتي يا روح قلبي عايزة تعرفي السؤال الي هتموتي وتعرفيه من كل واحد مفكر إسلامي زيي .. ايه رأيك في الحب ؟؟
حبيبتي .. حبي ما دام الحب في الله مفيش مشاكل
يبقى ليكي حبيب .. قدام علشان يقويكي على طاعة ربنا مفيش مشاكل
تخرجوا مع بعض عادي قدام علشان تتعدل الأحوال.. مفيش مشاكل
تتبادلوا النظرات والكلمات والجوابات والرنات ... قدام مش هنتقدم بالإسلام غير كده .. مفيش مشاكل
يغمزلك وتغمزيله .. قدام إحنا ما ينفعش نتقدم غير كده هنعمل ايه .. مفيش مشاكل
ت.............. ................................................................ مفيش مشاكل
إحنا هنا علشان علشان ننهض بالأمة عن طريقك .. لأن كل الطرق التانية مسدودة .. وبعدين طريقك انتي لذيذ ورايق ومية مية
سيبك من الإرهابين وخليكي معانا .. وما تنسيش الطبيعي يكسب
كلمة أخيرة يا أختي في الله .. مع دكتور راضي .. مش هتقدري تغمضي عنيكي

**********************************************************************************

من طرائف الدروس

الشيخ كشك رحمه الله : شيخ البلد والكلب

http://www.islamway.com/?iw_s=Lesson&iw_a=view&lesson_id=45985

**********************************************************************************

دمعة لله

مكالمة مبكية من أخت تطالب الدعاة بطلب وتبكي

http://www.4shared.com/file/15044396/8f6d3cfe/almkalma.html

**********************************************************************************

تلاوة متميزة

تلاوة مؤثرة جدا من سورة النمل للشيخ محمد حسان حفظه الله

http://www.4shared.com/file/15028600/7491aa71/27-1.html

**********************************************************************************

اخترنا لك

كتاب : كيف أتوب للشيخ محمد حسين يعقوب حفظه الله

http://www.4shared.com/file/15045667/c185b529/__online.html

نشيد : دعني للشيخ أحمد بو خاطر ===> نشيد مؤثر جدا جدا جدا

http://media.islamway.com/several/273/03_D3ni.rm

درس :الأشرار للشيخ محمد حسين يعقوب حفظه الله

http://www.islamway.com/?iw_s=Lesson&iw_a=view&lesson_id=61030

**********************************************************************************

وأخيرا نرجو أن تتقبلوا تحياتنا ويسعدنا تلقي مساهماتكم في الاستراحة بفقراتكم على البريد الآتي

AboAmerEl-deep@HotMail.Com

السلام عليكم ورحمة الله وبركاته