حفيدات عائشة - الحلقة الأولى

الحمدلله رب العالمين والصلاة والسلام على أشرف الخلق وإمام النبيين وبعد…

أهلا بيكم جميعا وسلسلة حفيدات عائشة

سلسلة موجهة بشكل خاص لجواهر ولآلئ المجتمع المسلم

نساء المسلمين اللي النبي صلى الله عليه وسلم وصّانا عليهم أكتر من مرة

نساء الأمة اللي النبي ضربلنا المثل في كيفية الحفاظ عليهم لما مسلمة واحدة تجرأ عليها يهودي من يهود بنو قينقاع وكشفوا عورتها

فكانت أول غزوة كاملة للنبي صلى الله عليه وسلم بسبب امرأة مسلمة

أختي في الله لازم تعرفي انك غالية أوي عندنا

ده انتي وصية النبي

علشان كده عملنالك سلسلة خاصة بيكي انتي

سلسلة حفيدات عائشة

مع ان باقي السلاسل برضه موجهة ليكي لكن علشان أهميتك عندنا فكانت السلسلة دي

أختي في الله

لازم في البداية تعرفي ان هدفي من كتابة السلسلة دي انك تدخلي الجنة

اه والله هدف من أهدافي انك تدخلي الجنة

وهدف تاني ان كل شباب المسلمين يدخلوا الجنة

وهدف تالت ان بصلاح المرأة المسلمة هينصلح حال الأمة كلها

وهدف رابع وهو الحصول على الخيرية اللي ربنا سبحانه وتعالى خص بيها أمة الإسلام لما قال سبحانه وتعالى : {كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ }آل عمران110

ممكن حد يقول اشمعنى المرأة وكل شوية انت بالذات تتكلم عن المرأة؟

أقوله علشان المرأة فعلا هي أهم كيان في المجتمع المسلم

هي نصف المجتمع وهي كذلك اللي بتربي النصف التاني

ومن المنطلق ده ابتدى أعداء الإسلام يوجّهوا سهامهم للأمة عن طريق المرأة المسلمة

ومن ضمن اللي قالوه ان المرأة لازم يكون ليها حرية!!!

كأن ربنا سبحانه وتعالى ماضمنش للمرأة حقها في تشريعه سبحانه وتعالى

عارفة يا أختي هما عاوزين يوصلوا بيكي لإيه

انك تكوني رخيصة زي مالمرأة عندهم رخيصة

عندهم المرأة بيستخدموها كأداة جذب للزباين لأي سلعة

عندهم المرأة تشتغل لنص الليل في أحقر وأحط الوظائف

عندهم المرأة مالهاش غير يوم في السنة اسمه عيد الأم يروحوا ويجيبولها هدية وتستناهم للسنة اللي بعدها علشان تشوفهم

لكن انتي يا أختي الكريمة ليكي عندنا مكانة عظيمة ومنزلة غالية

انتي يا أختي لو أبوكي أو أخوكي أو جوزك اتقتل وهو بيدافع عنك تعرفي انه يكون عند الله شهيد

يا أختي تعرفي ان الدين كرّم كل أم بأنه خلى صلة الرحم واجب على أولادها حتى لو كانت الأم كافرة

والله يا أختي فيه قصة كان ذكرها الشيخ محمد حسان في درس من دروسه وقال انه كان في أمريكا في سفر من أسفاره

وانه كان في زيارة من الزيارات لأحد الإخوة ولما وصلوا شاف امرأة أمريكية كبيرة في السن بتلعب مع كلبها في أحد الحدائق

المهم الشيخ راح الزيارة وخلص الزيارة وقعد مدة في الزيارة ولما جه يمشي لقى المرأة الأمريكية قاعدة في نفس المكان ولسة بتلاعب الكلب

ساعتها طلب من الإخوة اللي معاه انه يتكلم معاها وراح لها بالفعل وسألها ليه قاعدة من بدري بتلاعب كلبها

قالتله معندهاش حاجة تعملها!!!

سألها معندكيش أولاد أو أحفاد؟

ردت وقالت مش باشوفهم غير كل سنة مرة!!!

هي دي المرأة يا أختي عندهم

مجرد ماتبتدي تكبر في السن يبقي مالهاش أي أهمية عندهم ولايفكروا فيها أصلا

في حين انك عندنا غالية في كل مراحل عمرك

سواء طفلة صغيرة أو فتاة أو زوجة أو أم أو جدة وليكي نفس مقدار الحب من الجميع

هنتابع ان شاء الله يا أختي في الحلقات الجاية التركيز على شبهات أعداء الدين بالنسبة للمرأة المسلمة ونرد عليها كلها بإذن الله لصيانة المرأة المسلمة وصية رسولنا الكريم صلى الله عليه وسلم

موعدنا القادم ان شاء الله تعالى مع استراحة الروضة

انتظرونا

نحبكم في الله

والسلام عليكم ورحمة الله وبركاته